حكاية ولد اسمه جرجس

حكاية ولد اسمه جرجس

تنويه
==
هذه القصه حقيقيه
وقعت احداثها
و تقع
و ستقع

كقول رب المجد يسوع المسيح :

"في العالم سيكون لكم ضيق..

و لكن ثقوا..

انا قد غلبت العالم"

جميع الاسماء المذكوره في القصه غيرحقيقيه

و لا تشير لشخص ايا كان بعينه

الجزء الاول
======

كان ياما كان...كان فيه راجل طيب خالص اسمه عم شنوده و كان راجل غلبان صحيح
لكن كان دايما حاطط المسيح في قلبه و قدام عينه و مع انه كان مش متعلم و مايعرفش لا يقرا و لايكتب
الا انه كان دايما حافظ كلام الانجيل و كان دايما يروح الكنيسه عشان يسمع الانجيل في القداس
لان دى كانت الطريقه الوحيده اللي ممكن حد يقرا له في الانجيل اللي هو كان بيحب كل كلامه
لكن مش قادر يقرا فيه لانه مش متعلم
و كان عم شنوده لغاية وقتها و بعد 7 سنين جواز مش بيخلف و ماعندوش اولاد
و في يوم راح الكنيسه و كان قداس الاحد
وقف عم شنوده في اخر صف لانه كان حزين و علي وشك يبكي
و ماكانش عاوز حد يشوف الدموع بتلمع في عينيه من كتر ماكان راجل صلب و متماسك
و لما ابتدي الانجيل كان اللي بيقرا ولد شماس عمره حوالي 13 سنه لكن شكله كان زى الملاك
و لما عم شنوده شاف شكل الولد و سمع صوته و هو بيقرا الانجيل كان قلبه حايقف من كتر الحزن اللي ماليه
لكن في لحظه يرن صوت الشماس الصغير في ودانه زى اجراس الفرح و هو بيقرا الايه:

كل ماتطلبونه في الصلاه ..
مؤمنين..
تنالونه

قلب عم شنوده دق و عينيه لمعت و مخه راح في تفكير عميق لكن في النهايه
الامل الجديد ملا وشه تصميم و خلاص اتاكد عم شنوده هو حايعمل ايه
خلص القداس و كل الناس تقريبا خرجت لكن عم شنوده كان لسه قاعد
و عشان ماحدش يستغرب هو قاعد ليه لغاية دلوقتي... عمل نفسه بيحاول يلبس الجزمه الضيقه
اللي ماكانتش عاوزه تخش في رجله و اللي كان قلعها قبل مايخش يتناول
و كل الناس كانت تبص عليه و هم خارجين و يضحكوا
لكن كان فيه واحد واقف جنب الهيكل و ملاحظ عم شنوده من اول القداس

ابونا مرقس

و كان ابونا ملاحظ التمثيليه كويس قوى لكن هو كمان كان حزين جدا علي عم شنوده
و لان ابونا مرقس كان راجل نبيه جدا و يعرف طبع عم شنوده كويس خالص
علي طول فهم اللي في دماغ عم شنوده و اللي كل الناس ماكانتش فاهماه
و كانوا يبصوله وهم خارجين و يضحكوا عليه و هو بيتخانق مع الجزمه عشان تدخل في رجله
ابتسم ابونا مرقس لنفسه و بص وراه لصورة رب المجد الموجوده في الهيكل
و غمض عينيه و شفايفه تمتمت بكلام ماحدش سمع منه حرف
الا اللي موجود و ساكن في الهيكل
و بعدها نزل من جنب الهيكل و هو في طريقه للخروج ضحك و قال لعم شنوده
"ايه ياعم شنوده ..دى باين جزمه جلدها جملي..عموما علي مهلك و خد راحتك "
و هو خارج غمز بعينيه لحارس الكنيسه اللي مافهمش قصد ابونا بالضبط ايه
لكن كل اللي فهمه ان ابونا مرقس مش عاوزه يقفل الباب
لكن ليه؟؟؟...هو ده اللي مافهموش
و فورا يرفع عم شنوده راسه و يبص حواليه و يمينه و شماله
و لما اتاكد ان ما فيش حد خالص في الكنيسه قلع الجزمه
و دخل بسرعه علي طراطيف صوابعه للهيكل و هو عمال كل شويه يبص وراه

و نكمل الحكايه بكره

الجزء الثانى

======

]دخل عم شنوده الهيكل و تاني بص من ورا الستاره عشان يشوف اذا كان فيه حد في الكنيسه و الا لا
و اول ما اطمئن ان مافيش حد غيره نزل علي ركبه بانهيار و رمى راسه علي الارض و سجد و الدموع في عينيه عامله زى الحنفيه لما حس بالموكيت اللي في ارضية الهيكل اتبل و صرخ بصوت مكتوم كله الم و مراره
" اه ياابو الكل..ارحم عبدك..و انظر من سماك لنفس عبدك المكسوره..الناس كلت وشي ياربي و اهل مراتي عايروني و انت عارف اني ماعنديش عله و لا العيب من عندى..مراتي الله يسامحها مورياني الويل و مستنيه اليوم اللي اموت فيه عشان تتجوز غيرى وانت عارف اني مش باعملها غير كل خير ..و هي بتدبرلي كل شر..و الناس ابتدت تطمع في و في عرضي من كتر ما بيشوفوها و يسمعوها بتهين عبدك
مع انك عارف ان عبدك طيب و بيحبها
يا رب اتصرف انت بعدلك و رحمتك يا ابو الكل يا منبع الرحمه
===========
دخلت و جيهه الصيدليه و هي بتبص وراها لاحسن شنوده جوزها يكون مراقبها و ماشى وراها..هي قالتله انها رايحه السوق تشترى خضار
وجيهه : صباح الخير يا دكتوره ماريان..عاوزه الشريط اللي باخده كل شهر
الدكتوره ماريان : يا فايز (العامل اللي في الصيدليه).. هات شريط ميكروفلار بتاع منع الحمل من العلبه اللي في المعمل
فايز : العلبه انا حاططها قدام حضرتك يا دكتوره عالمكتب
الدكتوره ماريان : مافيش حاجه عندى.. شوفها جوه في المعمل
فايز : يا دكتوره انا لسه حاططها قدام حضرتك من عشر دقايق
الدكتوره ماريان : امال راحت فين..تعالي شوف انت حطيطها فين
و يدور فايز علي العلبه فوق المكتب لكن مافيش اثر..و يخش يدور جوه في المعمل و برضه مافيش اثر
الدكتوره ماريان : طب ممكن ياوجيهه تصبرى عليا لغاية بكره عشان يظهر ان العلبه خلصت و النهارده الاحد و شركة الادويه قافله النهارده..لكن بكره الصبح باذن المسيح وانتي رايحه السوق عدى عليا حاتلاقيني جبتهولك
وجيهه : اعملي معروف يادكتوره..شوفي لي شريط يكون منطور هنا و اللا هناك لاحسن حضرتك عارفه ان الدكاتره قالولي اني لو ولدت حاموت(بتكدب طبعا )

الدكتوره ماريان : يا فايز..دور كويس في الادراج علي اي شريط يكون منسي
و يدور فايز و برضه مافيش فايده..ووجيهه اتاخرت لان لسه حاتروح السوق و مش لازم شنوده يقلق و لا يحس بحاجه
فايز : ما فيش يادكتوره..بكره ياوجيهه زي الدكتوره ماقالتلك... عدى الصبح حاتلاقيه
الدكتوره ماريان : لو مستعجله يا وجيهه ممكن تشوفيه في صيدليه تانيه
وجيهه( و هي علي وشك تبكى فعلا من الورطه اللي هي فيها ) : حاشوف فين بس يادكتوره..النهارده الاحد و كل الاجزاخانات قافله و ماحدش فاتح الا حضرتك
الدكتوره ماريان : ماتخافيش قوى كده ياوجيهه..العمليه ماجتش من يوم..و الحمل مش بيحصل زى ماانتى فاكره بالسهوله دى
وجيهه (و هي علي وشك تخرج من الصيدليه) : امرى لله..حاعدى بكره علي حضرتك بس و حياة" فادى" ابن حضرتك ما تنسي..امري لله..حاقعد النهارده من غير برشام و ربنا يستر
و بعد ماتخرج وجيهه بحوالي خمس دقايق ينادي فايز علي الدكتوره ماريان: الحقي يادكتوره..شوفي فادى في المعمل بيحط ايه في بقه
و تجرى ماريان زى مايكون فيه حريقه رايحه تطفيها عشان تشوف فادى ابنها اللي عمره 3 سنين بلع ايه
الدكتوره ماريان : ايه ده اللي انت بتحطه في بقك ..؟؟؟؟؟؟؟؟؟..
و تتنفس ماريان بارتياح بعد مافتحت بق فادى و لحقت الحبايه من علي لسانه قبل مايبلعها.. و تبص للشريط اللي ناقص منه حبايه واحده اللي كان في ايد فادى و تقول :اشكرك يا يسوع..
وتنادى علي فايز : يا فايز..تعالي شيل علبة الميكروفلار دي في الدرج.. و مش عايزه اشوفك تحط اي دوا علي المكتب طول ما فادى في الصيدليه..مفهوم؟؟؟؟؟؟؟؟؟؟؟؟؟؟
فايز : حاضر يادكتوره
الدكتوره ماريان و هي بتضم فادى لصدرها) اشكرك يا يسوع...
و تيجي وجيهه علي بال ماريان في اللحظه دى و تبتسم و هي بتقول لنفسها: يالللا بقي معلش يا وجيهه..الاستاذ فادى جاله مزاجه يدوق اللي الستات بتاخده النهارده..حظك كده بقي حاعملك ايه
لكن ياترى صحيح ده كان..." حظ"......؟؟؟؟؟؟
حانشوف......!!!!!!!!

و نكمل بكره

الجزء الثالث

======

المكان : مكتب ابونا مرقس في الكنيسه

صبحى (حارس الكنيسه): قدسك نسيت الشوريه والعه امبارح في الهيكل..لكن الغريب يا ابونا اني دورت امبارح في كل مكان في الهيكل عليها اني الاقيها....؟؟؟ ابدا..نفسي اعرف قدسك حطيتها فين في الهيكل لاحسن تعمل حريقه في الكنيسه
ابونا مرقس (مندهش بعض الشئ لكن...بيفكر زى مايكون عاوز يتاكد من حاجه) : وانا من امتى بانسي الشوريه في الهيكل يا صبحى؟؟؟؟
صبحى : ما تاخذنيش قدسك..امبارح بعد ما قفلت الباب و دخلت انام شميت ريحة بخور جامده قوى جايه من الكنيسه..دخلت الهيكل ادور علي الشوريه لاحسن تكون قدسك نسيتها جوه الهيكل و الفحم والع فيها
ابونا مرقس (و هو عامل زى ما يكون مافيش حاجه و ان الموضوع عادي) :هيه..و بعدين ..لقيتها؟؟؟
صبحى : لا ياابونا ...بس انا لقيت نقط دم علي الموكيت اللي في ارضية الهيكل
ابونا مرقس ( و هو لسه برضه مش عايز يبين حاجه لصبحى قبل ما يدخل الهيكل و يشوف بنفسه):سلامة الشوف ياصبحي..انت جرى لك ايه؟؟؟..ما الشوريه قدامى اهيه علي المكتب
صبحى: ايوه صحيح ..ماتاخذنيش يا قدس ابونا..يظهر انى كبرت و خرفت..لكن ايه الدم ده اللي عالموكيت يا ابونا؟؟؟؟
ابونا مرقس : لا.. بس ده تلاقيه واحد رجله كانت متعوره و دخل يتناول امبارح..ما تشغلش بالك انت ..روح ياللا احسن انا عندى مشوار للكاتدرائيه و مش عاوز اتاخر
ويقفل ابونا مرقس المكتب و يدخل جرى علي الهيكل..و بعد مابص في الارض نادى علي صبحى عشان يوريه الدم اللي هو شافه علي الموكيت
ابونا : فين بقي الدم ده ياصبحي؟؟؟
صبحي(يشاور علي المكان اللي كانت راس شنوده ساجده فيه) : كان هنا يا ابونا صدقنى..مش عارف راح فين..يمكن عشان كانت الدنيا ليل امبارح اتهيالى انى شفت لون احمر علي الموكيت
ابونا : طب اخرج و اقفل الباب و تخليش حد يدخل دلوقتي
و بعد ما يخرج صبحى و يقفل الباب يطلع ابونا من جيبه مقص و يقطع الموكيت مكان ما شنوده كان ساجد و بعد ماخلص سجد في الهيكل هو كمان و هو بيتمم :
"اشكرك يا سيد الكل.. و ملك الكل ..لك يليق الاكرام و العزه و السجود"
"اسمح يارب لعبدك مرقس ياخد بركه من حبيبك شنوده"
و يقبل ابونا مرقس قطعة الموكيت اللي هو قصها
======
فات حوالي شهر و نص و شنوده قاعد في البيت بيسمع شريط القداس الغريغوري بصوت ابونا عبد المسيح الاقصرى و يخبط الباب بعنف و يروح شنوده عشان يفتح الباب و هو بيقول "مين"
الطارق : انا وسيم ابن عم فوزى(جارهم اللي في الشقه اللي قصادهم)
شنوده(بعد ما فتح الباب): خير ياحبيبي ..مالك بتنهج ليه..انت جاى تجري و اللا ايه ؟؟؟
وسيم :ايوه ..انا كنت مع ماما في السوق و طنط وجيهه كانت معاها بيشتروا الخضار
شنوده: و فيه حاجه حصلت ؟؟؟؟
وسيم : ايوه..طنط وجيهه اغمى عليها و ماما راحت بيها المستشفي و بعتتني عشان اقولك عشان تحصلهم علي هناك
======
فاتت ست شهور و شنوده عمال يعد الساعه و الدقيقه و كانهم كانوا ست الاف سنه
و يوم عن يوم يبص لبطن وجيهه اللي عماله تكبر شويه بشويه و الفرحه مش سايعاه
و هي تبصله و هى هاتنفجر من الغيظ و كل شويه تتمتم بشفايفها و تقول
"منك لله يا دكتوره ماريان..روحى الهى ماتكسبي"
و يسالها شنوده و هو بيبتسم :انتى كنتى بتقولي حاجه يا وجيهه؟؟؟؟؟؟؟؟؟
وجيهه ( و هى حاتموت من الغيظ ): لا ياخويا ماباقولش حاجه..انا بس بادعي علي واحده في بالي
======
المكان : قسم النساء و الولاده بالمستشفي
الزمان : حوالي 8 شهور من تمثيلية الجزمه الضيقه
الدكتوره : الولاده صعبه خالص يا عم شنوده..الست وجيهه في بطنها توام وواحد منهم و ضع راسه غلط خالص..هي دي اول ولاده للست وجيهه؟؟
شنوده : ايوه يادكتوره..ده احنا صبرنا سبع سنين علي بال ما ربنا اكرمنا
الدكتوره: ربنا يستر..هي صحتها ضعيفه و طلق الولاده جالها قبل ميعاده بشهر تقريبا
=====
الممرضه : مبروك يا عم شنوده جالك ولد و لسه التانى
شنوده : وهي عامله ايه؟؟؟؟؟؟؟؟؟
الممرضه : ربنا يستر يا عم شنوده..هي صحتها ضعيفه خالص..و الجنين التانى وضعه صعب قوى
=====
المكان : غرفة وجيهه في المستشفي
الزمان : بعد الولاده باربع ساعات
وجيهه(و هي بتنازع الموت) : امال فين البنت اللي انا ولدتها؟؟؟
شنوده : ربنا افتكرها يا وجيهه...المهم انتي ربنا يقومك بالسلامه و اهو البركه في الولد اللي جه..نشكر الله...نعمه كبيره من عنده
وجيهه: حاتسميه ايه يا شنوده؟؟؟
و في اللحظه دي تنادي الممرضه علي زميلها الممرض
"يا جرجس"....
".تعالي علق الجلوكوز لمدام وجيهه علي بال ما اشوف الدكتوره عاوزه ايه"
=====
نفس اليوم بالليل
الدكتوره : شد حيلك يا عم شنوده..البقيه في حياتك

و نكمل بكره

» حكاية مار جرجس وام النور مع مرثا
» دين أبوهم اسمه إيه .. جمال بخيت في بلدنا بالمصري
» حكاية .. الولا لوكا
» حكاية عبير .. قصة عجيبة بس حقيقية
» حكاية أجمل بنت فى مصر ..فيفيان مجدى