أحمد فؤاد نجم يكتب .. ينصر دينك يابطل

أحمد فؤاد نجم يكتب .. ينصر دينك يابطل

تحية لفنان الشعب المصرى عمنا أحمد فؤاد نجم
على قصيدته الجديدة لشهداء كنيسة القديسين
وعبر بتلقائيته وبساطته عما بقلبه
+++
من وسط دموعنا واهاتنا والامنا
بنقولك شكرا يافنان

+++

الثلاثاء 11 يناير 2011 - 12:

كتبت: ماريا ألفي إدوارد

على خلفية أحداث "الإسكندرية" ليلة رأس السنة،
والتي راح ضحيتها (25) قتيلاً بالإضافة إلى إصابة العشرات،
أطلق الشاعر "أحمد فؤاد نجم" قصيدة جديدة، قال فيها:

ينصر دينك يا بطل
قتلت ناس عُزًّل كتير
ستات، شيوخ، وكمان عيال
زحت عنا خطر كبير
دي ناس بتقول الله محبة
والمحبة دي شيء خطير
اقتل "بطرس" واقتل "مينا"
اللي إخواتهم ماتوا في "سيناء"
واللي ولادهم رقصوا فـي فرحك
واللي فـ ميّتم بيعزّينا
اقتل "ماري" وطنط "تريزا"
دول ناس مافيهومشي ميزة

دايمًا كده يبتسموا في وشك
ويقولوا أهلاً خطوة عزيزة
واقتل برضه عمّك "حنا"
في أي خناقه بيحوش عنّا
غاوي يصّلح بين الناس
ولا يمكن يوّرد على جنّة
واقتل"سامي ناجي نجيب"
أصل الاسم صراحة مريب
يمكن يطلع واحد منهم
أو داقق على أيده صليب
ولا أقولك.. اضرب "شبرا"
والكيت كات وميدان الأوبرا
فجَّر واحدة في كل مكان
خلّي جيرانهم يصبحوا عِبرة

لينا رب اسمه الكريم.. ها ييجي يوم تعرض عليه
تقف أمامه ويسألك: الشخص ده عملك إيه؟
بأي ذنب تقتله؟ وفين؟ ومين؟ وإزاي؟ وليه؟
ابقى قول لي يا بطل ها ترد يومها.. وتقول إيه؟

» صلوا من اجل اختنا سلوى فؤاد
» العظيم ..سيد القمنى يكتب .. العار
» عزاء .. نياحة والد الأخت الزميلة سلوى فؤاد
» د .سيد القمنى يكتب .. خطاب مفتوح الى ام النور
» هام جدا .. المؤتمر الصحفي للفريق أحمد شفيق 3 يونيو 2012