رسالة الى الشهيدة مريم فكرى

رسالة الى الشهيدة مريم فكرى

رسالة علي الفيس بوك

رسالة الى الشهيدة مريم فكرى N632910251_4592739_1869

كتبها إبرآم مقـــار

عزيزتي مريم فكري او «ماريوما» زي اسمك علي الفيس بوك ,

وصلتني رسالتك علي الموقع اللي بعتيها قبل نهاية عام 2010 بـ 293 دقيقة وبتقولي فيها

«٢٠١٠ خلصت خلاص .. أنا قضيت أسعد أيام حياتي في ٢٠١٠ وبجد استمتعت بالسنة دي ..
واتمنى ٢٠١١ تبقى أحسن .. عندي أمنيات كتيرة أوي في ٢٠١١ وأتمنى إنها تتحقق .. يا رب خليك جنبي وساعدني وتحقق الأماني»

فمعلش اتأخرت عليكي في الرد بس انتي برضه مش بس اتأخرتي علينا انت مارجعتيش من الكنيسة اصلاً.

صفحتك علي الفيس بوك وصل عدد اصدقائك فيها الي اكثر من 15000 صديق

ماحنا كده للاسف مش بنحس بقيمة الناس غير لما بيبعدوا عننا،
بس مين قالي انك بعيده طب ما انا ببعتلك رسالة اهو دانت قريبه جداً
وفي حضن حبيبنا الغالي ملك الملوك ورب الارباب امانه عليك تنقليلو رسالة.

قوليلو تعبانين حزاني اعيادك بنقضيها والدم مغرق اللبس الجديد والدموع ماليه العنيين علي اللي راحوا عندك عشان فارقونا.

قوليلوا انت قلتلنا «ارسلكم كحملان وسط ذئاب» يعني كان اتفاقنا علي ذئاب مش وحوش ذي اللي قتلونا في سيدة النجاة وكنيسة القديسين.

قوليلو ينفع نخلي ترحيم ليلة العيد لوحده لانه هيبقي طويل قوي والقداس مش هيخلص هنذكر مين ولا مين،

نذكر ابانوب ورفاقه شهداء نجع حمادي في ذكراهم السنوية الاولي ولا ميسون ورفاقها في الكشح في ذكراهم السنوية الحادية عشر
ولا نذكر مكاريوس وملاك شهداء العمرانية في ذكري الاربعين ولا نذكركم انتم ولا شهداء سيدة النجاه ولا مين ولا مين.

قوليلوا ولادك تعبانين قوي داحنا يمكن اسوء من عصر الوثنيين

ايوه بجد ده لما مرقس والد القديسة دميانه ترك الايمان قدر يرجع تاني للمسيحية واستشهد ومات مسيحي واتحققت امنيته،

شوفي دلوقتي بقي لو واحد اخطأ هو او حتي ابواه وساب المسيح لما ييجي يرجع للمسيح يدخل حارة سد اسمها العائدين للمسيحية
ويجبروه علي انه يعيش غير مسيحي شوفتي بقي ان ايام الوثنية كانت افضل.

كمان يا ستي ايام الرومان كانت احسن علي الاقل القديس بولس الرسول قدر يقول «اني رافع شكواي لقيصر»
تعالي بقي دلوقتي قولي رافع شكواي لقيصر وانتي تاخدي اسطوانة اهانة
واتهامات بالاستقواء بالخارج من جريدة الاسبوع والمصريون والجمهورية وغيرها.

ايام الشهداء كان مارجرجس بيقول ايها الملك الوثني الكافر كانوا بيقتلوه دلوقتي بنبايع ونأيد ونورث ونصفق ونزغرد وبرضه بيقتلونا.

قوليلو تعبانين جداً محتاجين لحضنه قوليلو بنحبك بس كلنا بنسأل بعض امتي هينتقم لدمائكم من الساكنين علي الارض.

قوليلو بنحبوا قوي بس بنقولك بعتاب مش كفاية طول اناه علي الاشرار. قوليلو بيسخروا منا وبيقولوا اين هو الههم.

نسيت اقولك طبعاً سمعتي العظة بتاعت الجناز مانت كنتي واحده من السبعة عشر اللي قدام الهيكل,
ما اقصدش عظة الانبا باخوميوس او الانبا يوأنس اقصد العظة اللي قالها الاقباط ،

شفتي الشجاعة اللي بقت في اخواتك ,اهم ادونا عظة في الايمان وضد الجبن والنفاق والضعف واثبتوا ان المؤمن بالمسيح قوي مايخافش.

شفتي دمكم عمل ايه في اخواتكم في الجسد الواحد جوه مصر وبره مصر.

بس معلش ماتزعليش مني عشان معرفتش انت مين في السبعتاشر ما انتوا كلكم كنتوا شبه بعض وكمان متغطيين.

سلامي لمارتينا اختك ومامتك وخالتك في الفردوس ويبقوا اسألوا علي باباكي فكري
عشان شوفته في قناة الحياة وكان تعبان قوي عشان سبتوه يكمل الدنيا لوحده.

اسيبك دلوقتي عشان نازل الكنيسة احضر قداس العيد وهبعتلك رسالة تانية لما ارجع اذا رجعت!!!

فاذا ما دخلش علينا في القداس مختل عقلياً قتلنا,
او بلطجي يكون محرضه عضو مجلس الشعب ويفتح علينا النار، او زي ما حصل معاكي ويفجرولنا عربية بدل بومب العيد.

علي العموم انا قلتلهم اذا حصلي حاجة هتتعرفوا عليا بسهولة، هكون لابس بدله سودا وقميص اسود
وهكون ماسك في ايدي ورقة وهكون متبت فيها قوي فيها اسماء كثيرة قوي هما شهداء 2010
بس عشان عامل حسابي اديها لابونا عشان يذكركم علي المذبح لو الكنيسة كلها ما بقتش مذبح.

يبقي اتفقنا يا ماريوما لو رجعت هبعتلك رسالة ثانية لو مارجعتش يبقي هشوفك وجهاً لوجه

باي

رسالة الى الشهيدة مريم فكرى 164766_174771112561586_100000860948306_358647_1807977_n

أذكرينا ياعروس المسيح امام عرش النعمة رسالة الى الشهيدة مريم فكرى 209715

اخواتك المتألمين

أولاد ام النور

» رسالة من الشهيدة عروس المسيح مريم فكرى
» مديحة للشهيدة مريم فكرى
» اخر كومنت للشهيدة مريم فكرى على الفيس بوك
» الشهيدة هناء يسرى
» عاجل :: 46 صورة للشهيدة المحبوبة وعروسة المسيح ||| مريم فكرى |||